Prins Erwin I

In bomvolle zaal van CC Don Bosco is op ’t prinsebal Erwin Houben es 51ste prins van VV de Gangmaekers oetgerope. Hieël ’t vastelaovendj vierendj volk van Hael waas aanwezig en rejageerdje entoesjaz wie Erwin I oêt de koeëker sjpróng.

Effe väörsjtèlle:

Ich bön geboeëre op 28 juli 1972 as zoon van Huub en Tiny Houben.De ieërste 3 jaor van miên laeve höb ich in Bögkeme gewoeëntj. Nao dees 3 jaor verhoêsdje wae nao Hael. In 1999 bön ich getrouwdj mèt miên vrouw Jolanda en zeen wae in Bieëgdje gaon woeëne. Hiej waerdje ós dochter Iris geboeëre. In 2004 zeen wae mèt de vastelaovendj weer trök nao Hael verhoesjdj. Oppe Kennedysjtraot is ós twieëdje dochter Lotte geboeëre. 
In 't dageliks laeve wirk ich op sjtichting Pergamijn in ein lieër en ontwikkelsentrum väör minse mèt ein versjtandelikke beperking.

Hobbies haedj Prins Erwin I genög. Meziêk make sjtuit dao biej väörop. Lid van zangkgroep New Generation en in ’t bendje KREB. Dao naeve zitj hae nog inne koverbend CU. Hiej kan hae ziên hardrock geveules de vrieje loup laote gaon. Ouch is Prins Erwin I is al jaore aktief oppe Bòntje Aovendj. Meziêk make mèt Veerman, de Hofsengers en mèt Globesjtein leuke ekts oppe plenk bringe.

Es adjedanten koos Prins Erwin I väör Brigitte Doensen, Marc van Aarsen en Ruud Janssen.

Gaer wil ich aafsjloête mèt miêne sjpreuk:

“Mèt rock in de meziêk door ‘t Gangmaekersriek!”